Då er eg tilbake på skulebenken igjen, saman med resten av klassa på VGII Byggteknikk. Vi er ikkje fullt så mange elevar i år som i fjor, men det ligg likevel an til å kunne bli eit triveleg år. Det er iallfall ei triveleg klasse! Så no skal det snart leggjast brede på skulebøkene. Iallfall gråpapir. Det er kulast.

Trass i at eg har fleire timar i veka det komande året, ser det lyst ut for dei andre aktivitetane eg driv med. Det kan sjå ut til at eg framleis får jobbe to dagar i veka med Bygg & System, samt at eg får litt kontortid på tysdagane til ungdomsarbeidarjobben. Kjekt å få gjort mykje på kort tid!

I dag har begge bygg- og anleggsklassene vore på ekskursjon til H-Produkter AS i Tennfjorden. Der fekk vi først ei flott innføring i korleis dei lagar vindauge og korleis eit vindauge fungerer. Dette var veldig lærerikt. Vi fekk seinare ei omvisning i fabrikken, der vi fekk sjå korleis dei produserer vindauga.

Vi fekk også lære om eit nytt konsept dei kallar Isolaft. Dette er isolerte tømmer-imitasjonar. Det ser ut som ekte tømmer, men Isolaften har betre isolerande eigenskapar, i tillegg til at den er lett å montere og mykje meir stabil.

Ein flott skuledag med andre ord. Gårsdagen var heller ikkje så verst, for i mangel på klasserom, inviterte eg klassa heim på grilling.. Herligt!

Som de kanskje veit, held eg på å ta fagbrev i tømrarfaget. På skulen held vi for tida på med eit nybygg til skulen. Bygget begynner for alvor å ta form, og i går kom dragaren på plass. Her kjem nokre bilete frå arbeidet med å få bjelken på plass for den som måtte være interessert.

I dag var eg med på ekskursjon til Grøvik Verk i Liabygda utanfor Ørsta. Dette er norges leiande produsent av komplette takrennesystem og den einaste produsenten av takrenner i aluminium i Noreg. Veit eigentleg ikkje kvifor eg skriv dette her, men eg er litt oppglødd etter dette besøket. Det var veldig fascinerande å sjå kor effektiv og gjennomført heile produksjonen av dei ulike takrennedelane gjekk føre seg. Storparten av produksjonen var det maskiner og robotar som tok seg av, så noko av det som slo meg først, var at det ikkje var så mange menneske der. I tillegg var det svært ryddig og reint, og alt var organisert og systematisert. Det var knapt nok støv på golvet, og i løpet av heile besøket, såg eg ikkje ein ting som ikkje låg der det skulle. For systemfrikar som meg, må eit besøk som dette være det næraste ein kjem kjensla Onkel Skrue må ha når han stuper ut i pengebingen sin. Som ein spiss på det heile, lagar bedrifta det meste dei har av maskiner og vertøy sjølve. Til slutt: Hugsa eg å fortelje at denne bedrifta produserer årleg 700 kilometer med takrenner kvart år? Det tilsvarer ein biltur frå Fosnavåg til Fredrikstad, via Dombås og Oslo.

Som eg nemnde tidlegare, var målet å få ein jobb i eit byggfirma, i tillegg til skulegong. Dette er no i boks! Eg har fått jobb på butikken på trelastlageret til Bygg & System på Mjølstadneset. Så langt har dette vore veldig kjekt! Arbeidsmiljøet er fenomenalt og arbeidet er veldig lærerikt! Målet er sjølvsagt å kome seg ut i feltet og snikre, men dette er verkeleg ein god plass å begynne.

Så var eg der igjen – på skulebenken. Det vil seie, det ser ikkje ut til at eg kjem til å slite ut så mykje stolar, skrivebord og albogar dette året, for det meste av undervisninga eg er med på, går føre seg utandørs. Eg har nemleg teke til å ta fagbrev som tømrar ved Herøy vidaregåande skule. Allmennfaga har eg frå før, så eg skal berre ha tre fag dette året. Faga heiter Produksjon, Teikning- og Bransjelære og Praktisk Fordjupningsprosjekt. Eg fekk hoppe på undervisninga no i slutten på oktober, og eg hoppa rett inn i det som ser ut til å være eit kjekk klasse, så dette ser lovandes ut! Planen framover vert med andre ord å gå to år på Herøy vidaregåande skule, før eg tek til på den to-årige lærlingtida. Om alt går etter planen, får eg jobb i eit byggfirma i området. Skulen er greie og ha med å gjere, så det er opning for at eg kan få godkjent ein slik jobb som ein del av undervisninga. Og så ville det vore veldig fint å få ein fot innanfor systemet og skaffe seg relevant yrkeserfaring så tidleg som råd. Vi får sjå kva som skjer. Eg trur iallfall at dette er eit steg i rett retning.